Det var arkitekt og ørsting Alf Apelseth som teikna kyrkja, og den sto klar 28. april 1974. Jubileumsgudstenesta var godt besøkt, for mange ville feire det 50 årige byggverket.
- Femti år for ei kyrkje er ikkje så lenge. Vi ser bakover i takksemd, og framover i håp og forventning, sa prost Ingeborg Matre. Preika vart halt av biskop Ingeborg Midttømme.
Folkestad/Tonika Musikkorps spelte, koret Fjordafolk deltok med song, Ragna Hofset Kile dansa ein dans som Solveig Styve Holte hadde koreografert.
Komande sokneprest Kristine Myrene Bleikli og kyrkjelydspedagog Martine Hjertvik Urke var med på gudstenesta. Ein annan hedersgjest var prest Gunnar Skrede. Han var til stades både på innviinga i 1974, og no 50 år etter på jubileumsgudstenesta.
