Røldal sokneråd og Bjørgvin bispedøme samarbeider om pilegrimsstemnet i Røldal første helga i juli. Pilegrimar frå Moster og Stavanger vert mottekne liturgisk fredag ettermiddag, og seinare på kvelden kan ein sjå Røldalsspelet "Den lange vegen".
Laurdag 8. juli vert det program heile dagen, med mellom anna morgonbøn, bygdevandring, stille time i kyrkja, krossvandring og midnattsmesse. Frå klokka 10.00 er det eit seminar kalla "Der himmel møter jord". Kulturrådgjevar i Bjørgvin bispedøme, Ragna Sofie Grung Moe leier dette møtet, og ho har stor tru på at dette blir svært bra. Deltakarane på seminaret er professor Jørn Øyrehagen Sunde, dialogprest Ann Kristin Zijp Nilsen og professor Justin Kroesen. Dei har kvar sine innlegg før dei samtaler om heilage stader - er stadane heilage eller blir dei det?
Fullt program finn du nederst på sida under "dokument". Ein treng ikkje melde seg på på førehand for å vere med. Ta gjerne kontakt med Ragna Sofie om du har spørsmål om pilegrimsstemnet.