I Sund var det to spente førsteklassingar som fekk vere med på gudstenesta, medan Blomvåg kunne gle seg over heile ti, og i Fjell var det åtte små som kom med skulesekken sin. Under gudstenestene fekk barna ei eiga velsigning for både skulesekken og det nye skuleåret som ventar.
Presten og stigen
I Fjell vart ranselbøna kombinert med T6-dagen. Barna fekk ei aktivitetsbok, og både før og etter gudstenesta var det teikning og hobbyaktivitetar. Tema for T6-dagen i år var historia om Sakkeus, den vesle mannen som klatra opp i morbærtreet for å sjå Jesus. Sokneprest Per gjorde forteljinga ekstra levande ved å klatre opp i stigen til preikestolen medan han song «Sakkeus var ein liten mann». Etterpå var det kyrkjekaffi med kaker, saft og kjeks til alle.
Fekk vere med å hjelpe
Under talen i Blomvåg fekk alle borna kome fram i kyrkja og hjelpe sokneprest Espen med på å dramatisere historia om Peters fiskefangst. Det var mykje flott song under gudstenesta, og vaksne og barn var med som forsongarar og hjelpte til med å synge i mikrofon, noko som skapte ei levande og engasjerande stemning. Etterpå vart det ei flott samling i borggarden. Der skein sola og kyrkjelyden fekk kose seg med vaflar, muffins og sjokoladekake.
Innsetting av ny kyrkjelydspedagog
I Sund var gudstenesta denne gongen ekstra spesiell fordi Beate Sørhus vart innsett som ny kyrkjelydspedagog. Ho vart velsigna gjennom forbøn og tale, og etterpå vart det kake og kaffikos i kyrkjelydssalen.
Neste helg blir det ranselbøn i Landro og Foldnes kyrkjer, der nye førsteklassingar vil få same varme velkomst og velsigning for skuleåret som no er i gang.