Tekst: Jacob Henrik Hellesund, leiar av Jubileumskomiteen
For jubileumsveka har vi latt oss inspirere av historia men vi vil også bringe fram verdiar i dag som vi kan bygge videre på framover. Visjonen vår er «Heim i samtid» og denne knyter oss også opp til Kulturverndagane. Fram gjennom generasjonar er det mange som har gode minner her i frå. Det vere seg dei som har vakse opp i dette lokalsamfunnet like mykje som tilflyttarar og utvandrarar.
Med den urolege tida vi opplever i verda no med krigar mellom land som vi trur er fredselskande, er det godt å ha eit lite lokalsamfunn der vi har nærleik, samspel og dugnad. Dette gjer vi i respekt for kvarandre sjølv om det kan vere ulike haldningar, meiningar og tru.
Gjennom jubileumsveka ynskjer vi å ta med unge som gamle på vandring gjennom ei 150 års historie. Korleis var livet, kvardagen, kristendommen og trua når kyrkja og gravplassen vart etablert og kva endringar har vore fram gjennom tida.
Vi ynskjer å starte vandringa i Hjelme kyrkje (nye) ved at dei som vil, kan vandre i turløypa til gamlekyrkja medan andre køyrer bil. Med vandrestav og dikt gjennom utmarka vil ein oppleve natur, stilla og ro, slik det kanskje var i gamal tid. Eit enklare opplegg i naturen for dei som ikkje kan gå i turløypa.
Konsert på søndag 31/8 opnar jubileumsveka for feiring av kyrkja og kulturverndagane. På tysdag 2/9 kjem elevar og lærarar ved Tjeldstø skule og deltek i vandring, opplever gamle tradisjonar og historia. Onsdag 3/9 er det kulturkveld og basar i Hjelme kyrkje (nye) der vi håpar på inntekter til jubileumsfeiringa, toalett og oppvarminga av Hjelme gamle kyrkje. Fredag 5/9 er det ungdom som trår til med song og musikk. Den store jubileumsdagen blir søndag 7/9 med vandring til kyrkja, gåande gjennom utmarka/turløypa, nokon køyrer og andre kjem i båt sjøvegen. Ved kyrkja og på kyrkjebakken er vi festkledde, nokon i dagens klede, andre i gamle klede og vi tek mot presten som kjem sjøvegen inn Hjelmevågen før det vert gudsteneste med påfølgjande kyrkjekaffi i Notanaustet og aktivitet på kyrkjebakken. Utstilling og jubileumsskrift er ein del av feiringa.
Eg er døypt og konfirmert i denne kyrkja. I dag er den ofte eit hyggeleg mål for turen gjennom utmarka eller i båt inn Hjelmevågen. Eg viser den stolt fram når vi har besøk. Det gjev ei eiga ro og stillheit når eg går inn grinda, omgitt av den gamle steingarden, ruslar rundt på gravplassen og monumentet over falne i krigen. Eg er glad og takksam over den positive responsen frå bygdefolk som stiller opp og gjer ein dugnadsjobb for kyrkja og nærområdet. At vi har organisasjonar som samarbeider om dette, er flott.
Ei stor takk til Nærmiljøutvalet for Bakken krins, Den norske kyrkja Hjelme og Blomvåg sokn, bygda Hjelme, Øygarden Sogelag og Kystmuseet i Øygarden som dannar Jubileumskomiteen, samt medverknad og støtte frå Folkeakademiet Vest og Kulturvernforbundet. Mange takk for gode bidrag i form av tilskott, sponsing, gåver til utlodding m.m.