I duoen Fossum/Aukrust får vi oppleve eit unikt lydbilde: Den lågmælte og klangfulle langeleiken, som har levd i minst 500 år i Noreg - i kombinasjon med kyrkjeorgel, eit av dei mektigste instrumenta vi har. Gjennom konserten får vi høyre folkemusikk frå Gudbrandsdalen og Valdres i ein ny musikalsk drakt: Halling og springleik, lyarlåttar og bådnsullar, delvis i kombinasjon med nyare, klassiske verk. Mykje av musikken har fjell- og stølsliv som tema, frå fjella som skiljer heimtraktene til dei to utøvarane. Langeleiken og orgelet skiftar mellom å ha ein ledande rolle, og vi får òg høyre song og kraviklyre.
I tillegg til konserten blir det servering av kaffe og kaker, og Johanna Fuglesteg og Mona Dalen vil fortelje litt om historia til denne lille kyrkja som ligg i Øyebygda - på vestsida mellom Slidre og Røn. Billettar kjøpast døra. 150 kr for vaksne og gratis for Ung INN-medlemmar (https://unginnlandet.no/ungdomsordninger/unginn/) og born under 13 år.
Denne markeringa er eit samarbeid mellom Røn sokneråd og Valdres Folkemusikkarrangement AS og arrangementet er støtta av Vestre Slidre kommune, Vestre Slidre Historielag, Norsk Kulturfond og Kiwi Røn. Alt eventuelt overskudd for dette arrangementet går til Røn sokneråd.
