Jupmele! Rohkelibie veartenen aalkoe-almetji åvteste jïh dej staeries reaktah lïhtseginie dov redtesne årrodh.Voerkelh veartenen åvtehkidie jïh veartenen gærhkojde guktie sijhtieh aalkoe-almetji reaktah eevtjedh. Viehkehth gaajhkide jaahkoles almetjidie baakoejgujmie haedtiem jïh daaresjimmiem vuastalidh.
Jupmele! Rohkelibie saemiej åvteste. Vedtieh mijjese gaarkh jïh buerie ektievoeth. Årroeh mijjine aktine. Gijhtebe dov buerie vadtesi åvteste. Goltelh gosse dutnjien tjåarvobe jïh sjoehkedibie gosse ibie åajsoeh maam jiehtedh. Vaarjelh mijjem, mijjen barkojde jïh mijjen dajvide. Baajh mijjem guessine jïh vaarjelæjjine dov eatnamisnie årrodh.
Jupmele! Rohkelibie saemiej gïeli åvteste. Eevtjh gærhkojde jïh åålmegidie gïelide fraakas utnedh guktie dov bueriesaernie gaajhkine gïeline govloe. Gåhtjoeh almetjidie dov deanarinie sjïdtedh guktie mijjen leah hearrah, ööhpehtæjjah, diakovnh jïh tjoejehtæjjah gïeh maehtieh saemiestidh jïh saemien kultuvrem jïh vuekide daejrieh.
Jupmele! Vuesehth mijjese gaajhkem man åvteste maehtebe gijhtedh jïh mestie maehtebe aavoedidh. Gijhtebe beajjetji åavtoej åvteste jïh dov sjugniedimmien åvteste. Vuesehth mijjem guktie edtjebe sjugniedimmiem vaarjelidh. Mujhtehth mijjem guktie mijjen maadtoeh jieliejin destie maam datne eatnamistie vedtieji. Mujhtehth mijjem mijjen vuekide jïh jielemem nænnoestidh. Bïhkedh mijjem sinsitniem jååhkesjidh guktie mijjen jaahkoe raeffien baalkam åådtje.
Jupmele! Vedtieh mijjese vïssjelesvoetem guktie arhpebe dejtie gïeh jiermehth leah jïh guktie raeffesne jielebe dejgujmie gïeh tjaegrieh jïh guktie iehtsebe dejtie gïeh mijjem aassjoestieh jïh guktie hoksebe dejtie gïeh mijjem leajmoedieh. Vedtieh mijjese ïedtjem ov-reaktaj jïh væssjoen jïh slognestimmien vuestie barkedh. Vedtieh mijjese jiermieh guktie bahhasvoetem vuastalibie jïh guktie raeffiem jïh ektievoetem eevtjebe.