NMS JOBBAR FOR Å
• Bekjempe urettferd
• Dele trua på Jesus
• Utrydde fattigdom
Fitjar kyrkje har inngått avtale med Det norske misjonsselskap om å støtte eit prosjekt i Mali.
I Mali rettar arbeidet seg i hovudsak mot fulaniane, eit nomadefolk med ein sterk og stolt tradisjon. Ein har fokus på å dele trua på Jesus i ord og handling på ein forståeleg måte, som ligg nær tradisjonen. Ein bruker tid på å byggje relasjonar til einskildpersonar for å skape tillit og respekt.
Arbeidet i Mali omfattar m.a.:
KYRKJELYDSBYGGING
Tre kyrkjelydar møtest regelmessig til gudsteneste og søndagsskule på fulani. Kyrkjelydane har også aktive kvinnegrupper og ungdomsgrupper, ulike diakonale tiltak og evangelisering.
LANDSBYUTVIKLINGSPROSJEKT
Omskjering (kjønnslemlestelse) og fødselsskadar skaper store problem for jenter og kvinner i Mali. I samarbeid med lokale helsearbeidarar har eit utviklingsprosjekt støtta av NMS og Norad, oppnådd svært gode resultat. Mange landsbyar har slutta heilt med kvinneleg omskjering, og innsatsen held fram i stadig nye landsbyar.
FLYKTNINGAR
På grunn av uro i Mali dei siste åra er det mange internflyktningar i landet. Diakoniarbeidet gir hjelp og støtte til flyktningane mellom anna ved å byggje vaskestasjonar i flyktningeleirane.
USE YOUR TALENTS-METODEN
Metoden er tatt i bruk i Mali, og medarbeidarane som jobbar i utviklingsprosjektet er begeistra over resultata. Metoden går ut på å identifisere og bruke tilgjengelege ressursar til beste for lokalsamfunnet. Ungdomsgrupper har for eksempel planta tre og starta hønseoppdrett.
RADIO
Det blir produsert radioprogram på fulani som blir sendt over heile Mali. Dei inneheld både formidling av kristen tru og undervisning om relevante tema innan helse for både menneske og dyr.
BIBELOMSETJING
Ein arbeider med å omsetje Bibelen til fulani. Det nye testamentet blei ferdig i 2005, medan ein no jobbar med å omsetje Det gamle testamentet. Nokre einskildbøker frå GT er ferdige og tekne i bruk.
MISJONÆRAR
Arbeidsfellesskapet i Mali består av misjonærar frå Noreg og fleire afrikanske land, i tillegg til nasjonale medarbeidarar.
For meir informasjon om NMS og prosjektet i Mali: NMS - Det Norske Misjonsselskap - NMS