I desember 2022 fekk Landro kyrkjelyd innovasjonsmidlar frå Kyrkjerådet til det diakonale prosjektet “God nok.” Prosjektet varer fram til sommaren-24. Landro skule, som ligg rett ved kyrkja, er hovudsamarbeidspartnaren vår.
God nok blir leia av diakon Torunn Nateland Utvær i nært samarbeid med helsesjukepleiar på Landro skule. Frivillige pensjonerte pedagogar er også med på prosjektet. Tilbodet er livssynsope.
Gjennom “God nok” vil me bidra inn i arbeidet med livsmeistring for barn på mellomtrinnet. Hovudfokuset er å styrkja den psykiske helsa til barn og unge og gi dei gode verktøy for å meistre ungdomstida. Me vil skapa trygge gode møteplassar der barn kan oppleva eit godt fellesskap, byggja trygge gode relasjonar til andre barn og vaksne og erfara meistring.
Ein dag i veka har me aktivitetar som:
- Jente- og gutegrupper som elevane er med på i skuletida. Gruppene blir leia av diakon og helsesjukepleiar. Her tek me opp aktuelle tema innan psykisk helse, som for eksempel sjølvbilete og sjølvtillit, vennskap, mobbing og utanforskap.
-«Etter skuletid.» Vi er i kyrkja der me har eit varmt måltid med tid til god prat rundt bordet. Me er mange vaksne, både tilsette og frivillige, og dette gir oss moglegheiter for å sjå den enkelte. Me har aktivitetar der me samarbeider og har det kjekt saman. Me tenner lys i lysgloben, speler bordtennis, biljard og andre spel i kyrkjekjellaren. Framover vil me også gå på turar og ha fleire aktivitetar ute i kyrkjehagen og i nærmiljøet.
Ønsket er at innovasjonsprosjektet også skal bidra til å styrkja kyrkja i lokalsamfunnet, og samarbeid med lokale aktørar er sentralt i prosjektet.