Gosse bæspa Tor Singsaas jaepien 2017 pensjonistine sjïdti, sïjhti Saemien Åålmegasse vadtesem vedtedh. Vadtesem edtji maanaj jïh noeri gaavhtan utnedh. Saemien Åålmegeraerie aamhtesem digkiedi, jïh nænnoesti ”laavenjassh-gærjam” Mijjen gærhkoe-gærjese darjodh. Daelie daate gærja riejries – dam nommestahteme Mijjen Gærhkoe-gærjetje DARJOEMASSE.
Orre gærjan lea luhkietjihtje ovmessie laavenjassh. Tjuetie-njieljieluhkie-vïjhte bielieh vuesiehtieh guktie daevieridie jallh deerpegidie darjodh, beapmojde jurjiehtidh jïh spïeline lustestalledh. Gærjan gïelh lea saemien gïele jïh daaroen gïele, parallelle vuesiehtamme.
Goevten voestes biejjien orre gærjam heevehtin Tråantesne. Voestegh almetjh gyrhkesjin Nidarosen stoere-gærhkosne. Gyrhkesjimmien mænngan Erkebispegård:se tjåanghkenin prïhtjegem jïh aaloem jovkedh jïh laavenjasside Darjoemasse-gærjeste darjodh.
Bæspa emeritus Tor Singsaas håaloeji. Bæspa Tor geerjene lij gærjan gielhtie. Saemien Åålmegen jaahkoe-ööhpehtæjja Meerke Krïhke Leine Bientie soptsesti DARJOEMASSE-gærjan bïjre jïh buerkiesti guktie laavenjasside darjodh. Jïh laavenjassh hov luste darjodh. Maanah jïh geerve idtjin sïjhth laavenjassigujmie orrijidh. Tryjjes ektesne årrodh.
Gærjan voestes dïedteme joe doekesovveme. Saemien Åålmegeraerie jis mubpien dïedteme dongkeme. Saemien Åålmegen åvtehke Monica Kappfjell jeahta almetjh varki maehtieh gærjam vihth åestedh. –Darjoemasse tjaebpies gærja. Geerjene gærjam mijjen luvnie lea, Kappfjell jeahta.
Einar Sørlid Bondevik
Fra Daerpies Dierie