Avtalen vart signert 28. oktober i «Freds og foroningskyrkja» Trefoldighetskirken i Oslo. Avtalen er ei vidareutvikling av samarbeidet som gjennom fleire tiår har vore regulert gjennom avtalar med Mellomkyrkjeleg råd, til ein breiare avtale for heile Den norske kyrkja.
– Kirkens Nødhjelp er ein svært viktig del av Den norske kyrkja sitt internasjonale diakonale engasjement. Med denne avtalen ønskjer vi å styrkje samarbeidet og forankre det endå tydelegare i heile kyrkja.
Det seier Harald Hegstad, leiar i Kyrkjerådet, som signerte på vegne av folkekyrkja. Seinare vil også preses Olav Fykse Tveit signere avtalen.
– Våre kyrkjelydar er medvitne at Kirkens Nødhjelp er vår organisasjon, noko som særleg vert uttrykt i den stor deltaking i fasteaksjonen kvart år, seier Hegstad.
– Ein diakonal arm
Den norske kyrkja er ein av oppdragsgjevarane for Kirkens Nødhjelp. Organisasjonen driv mellom anna humanitær innsats, langsiktig utviklingsarbeid og arbeid for rettferd, fred og berekraft. Den norske kyrkja er også representert i styret og representantskapet i Kirkens Nødhjelp.
Generalsekretær i Kirkens Nødhjelp, Anne Cecilie Kaltenborn, er glad for den nye avtalen.
– I ei tid der utviklingsarbeid vert diskutert er det viktig å minne om at Den norske kyrkja er ein viktig oppdragsgjevar for oss, og at Kirkens Nødhjelp er kyrkjas forlenga diakonale arm.
Stolt av samarbeidet
Den nye avtalen peikar ut ti konkrete samarbeidsområde. Mellom desse er Fasteaksjonen, katastroferespons, kirkeoffer på julaften, kommunikasjon, samarbeid med søsterkyrkjer, politisk påverknadsarbeid og samarbeid knytt til Kirkenes verdensråd (KV) og Det lutherske verdsforbund (LVF).
Avtalen legg også opp til tettare og gjensidig bruk av faglege ressursar.
– I ei verd som har blitt meir krevjande dei siste åra, med meir krig og konflikt, mykje dyrare energi og matprisar og fleire klimakriser som ofte rammar dei fattigaste, er kyrkjeleg solidaritet blitt enda viktigare. Vi er stolte av det utruleg viktige arbeidet vi gjer saman med Kirkens Nødhjelp og deira verdsvide nettverk gjennom ACT Alliance, seier Einar Tjelle, generalsekretær i Mellomkyrkjeleg råd for Den norske kyrkja.
