Det har vorte vanskeleg å samle folk til gudsteneste, men ingen har sagt at du og eg ikkje kan opne opp Bibelboka kvar for oss og lese i han. Det har heler ikkje kome forbod mot å falde hendene og be, eller å lyse velsigninga og teikne krossmerket. Alt dette kan du og eg gjere nett der vi er, utan prest og utan kyrkjerommet.
Så difor, ei utfordring frå meg til deg:
1. Finn Bibelboka di eller eit Nytestamente og begynn å lese samanhengande frå Lukas-evangeliet. Gjerne nokre kapittel kvar dag. Ikkje gje deg før du har lese heile Lukas, - det er faktisk ikkje så langt!
2. Bei ei kort bøn kvar dag. For deg sjølv. For situasjonen i landet vårt og for kyrkjelyden vår. Avslutt med Fadervår.
3. Teikn krossmerket over deg sjølv, slik du alltid vert velsigna ved slutten av ei gudsteneste.
Eg gler meg til å møta deg att i kyrkja, men inntil vidare så håpar eg at vi saman kan gjere dei små tinga som kristne menneske til alle tider har gjort, også når dei ikkje har hatt ei kyrkje å gå til: Å lese frå Bibelen og å be.
Herren velsigne deg og bevare deg!
Helsing
Ingvald Andersen Frøyen
Sokneprest i Førde, Holsen og Haukedalen